Спорт немесе шығармашылықпен байланысты бизнеске ваучер алу

Мемлекеттік қолдаумен спорттық немесе шығармашылық бизнес ашқысы келетін кәсіпкерлер балаларға арналған спорт мен шығармашылықты дамыту бойынша жан басына шаққандағы қаржыландыру бағдарламасына қатысып, қызмет көрсетуге ваучер ала алады. Мұны қалай жасау, қандай талаптар орындау керектігін және бөлінген ақша бойынша есеп беру жолдары туралы осы мақалада айтып береміз.

Жобаның мәні

Балаларға арналған мемлекеттік спорттық және шығармашылық тапсырыстың жан басына шаққандағы қаржыландыру — бұл бюджет қаражатынан әрбір балаға спорттық немесе шығармашылық сабақтарға тегін қатысуға мүмкіндік беретін мемлекеттік бағдарлама. Ол Қазақстанда 2021 жылдан бері жүзеге асырылуда. Бағдарламаға қатыса алатын балалардың жасы төрт жастан 18 жасқа дейін бекітілген (әр секция мен үйірменің өз жас шектеулері бар).

Бағдарламаның операторы — жергілікті әкімдік, ол бюджетті ақпараттық жүйелер (платформалар) арқылы таратады. Ваучерлер алғысы келетін секциялар мен үйірмелердің ұйымдастырушылары жүйелерде қызмет көрсетуші ретінде тіркеле алады.

Бағдарламаға барлық облыстардың, республикалық маңызы бар қалалардың, ірі облыс орталықтарының кәсіпкерлері қатыса алады. Өтінімдер жыл бойы қабылданады, кестені облыс әкімдіктерінің сайттарында және ақпараттық жүйелердің әлеуметтік желілерінде қадағалауға болады.

Бағдарламаға қатыса алатын азаматтар

Спорттық секциялар мен шығармашылық үйірмелер ашуды жоспарлап отырған кәсіпкерлер грантқа өтінім бере алады. Бағдарламаға барлығы 64 спорт секциясы кіреді, оның ішінде бокс, дзюдо, жүзу, футбол, баскетбол, үстел теннисі, шахмат, би спорты және т.б. Секцияларының түрлерінің толық тізімімен осы сілтеме арқылы танысуға болады.

Шығармашылық бағыт бойынша 50 үйірме бар — олардың ішінде би, сурет салу, модельдеу, тоқу, актерлік шеберлік, бейнетүсірілім және монтаждау, флористика, вокал, музыкалық аспаптарда оқу және басқа да бағыттар. Шығармашылық үйірме түрлерінің толық тізімі осы сайтта орналасқан.

Өтінім берушілерге қойылатын талаптар

Қызмет көрсетушілер келесі талаптарға сай болуы керек:

• ЖК немесе ЖШС ретінде тіркеу.
• Арнайы білімі бар білікті қызметкерлер (жоғары, орта арнаулы). Өтінім спорт бағытына берілсе, онда қызметкерлердің мамандығы «Дене шынықтыру және спорт» болуы керек, ал шығармашылық үйірмеге берілген профиліне сәйкес келу керек. Қызметкерде «Спорт шебері» атағы болса, диплом талап етілмейді, бірақ жаттықтырушы атағы туралы уәкілетті органның шешімі қажет.
• Балалар айналысатын орын санитарлық және техникалық нормаларға сай болуы, қажет құрал-жабдықтар мен керек жарақтар, бейнебақылау камералары болуы, балалар үшін қауіпсіз болуы тиіс. Спорт секцияларына арналған орын осы сілтемеде жазылған талаптарға сай болуы керек, ал шығармашылық үйірмелерінің талаптары — осында (талаптары бірдей).

Бағдарламаға қатысу үшін қажет құжаттар

• мемлекеттік тіркеу туралы куәлік немесе ЖК ашу туралы хабарлама,
• мемлекеттік спорт немесе шығармашылық тапсырыстарды жеткізуші болу ниеті туралы мәлімдеме (платформалар арқылы жасалады),
• сабақтар өткізілетін орынға құқық белгілейтін құжат немесе жалдау туралы келісімшарт,
• мақсаты мен міндеттерін, мүмкін нәтижелерін, жабдықталуын, сабақ өткізу кестесін сипаттайтын оқу бағдарламасы,
• санитарлық-эпидемиологиялық қорытынды,
• қызметкерлердің дипломдары, алғашқы медициналық көмек көрсету курстарын бітіргені туралы сертификаттар және наркологиялық, психо- және туберкулезге қарсы диспансерлерден анықтамалар, соттылығының жоқтығы туралы анықтама.

Ваучер қандай мақсаттарға беріледі

Ваучер жеткізушінің келесі шығындарын өтейді:

• қызметкерлердің жалақысы,
• мүлікке арналған шығындар (үйжайды жалға алу, коммуналдық шығындар)
• шығын материалдары мен жабдықтар (жеткізуші балаға өз профилі бойынша сабақтарға арналған құралдарды ұсынуға міндетті, мысалы, мольберт, қарындаштар, жеке кілемшелер, үстелдер, орындықтар және т.б.).

Жеткізуші баланың ата-анасынан жеке жабдықты есептемегенде, мемлекет төлейтін сабақтарға қосымша ақы алмауы керек.

Өтінім беру жолдары

Үміткер онлайн өтініш бере алады. Ол үшін:

1. Тіркелу үшін платформаны таңдау керек, олардың үшеуі бар:

• damubala.kz (Астана, Алматы, Шымкент, Батыс Қазақстан облысы, Шығыс Қазақстан облысы, Атырау, Ақмола, Солтүстік Қазақстан, Түркістан, Жамбыл, Абай, Қызылорда, Қостанай облыстары, сондай-ақ Жетісу және Ұлытау облыстары),
• artsport.edu.kz (Алматы, Шығыс Қазақстан, Қарағанды, Маңғыстау, Павлодар, Солтүстік Қазақстан, Түркістан, Абай облыстары және Жетісу),
• darabala.kz (тек Ақтөбе облысы бойынша).

Кәсіпкерге тіркелу кезінде рөлді таңдау керек: қызмет жеткізуші, баланың заңды өкілі немесе жаттықтырушы. Профильдегі барлық рөлдерді таңдап, болашақта бір кабинеттен екіншісіне ауысуға болады. Платформаларда тіркелу үшін ЭЦҚ қажет. Damubala.kz порталында жеткізушілерді тіркеу бойынша нұсқаулық — осы сілтемеде.

1. Сауалнаманы толтырып, қызметкерлер туралы ақпаратты қосыңыз, қажет құжаттар тіркеңіз.
2. Мемлекеттік тапсырыс қызметтерін жеткізушінің тізіміне енгізу үшін оператордың қарауына өтінім жіберу. Шешім он күн ішінде қабылданады.
3. Мақұлданған жағдайда жүйеде «қызмет жеткізуші» деген хабарландыру пайда болады, содан кейін балаларды жазу үшін шығармашылық үйірме немесе спорт секциясы туралы ақпарат орналастыруға болады. Бас тартқан жағдайда талаптарға сәйкес келмейтіндігі туралы жауап келеді.
4. Келесі қадам — жеткізуші ваучерлерге өтінім береді. Өтінімде ол өз қызметкерлерінің жұмыс уақытына қарай қабылдай алатын орындар санын көрсетеді. Оператор өтінімді қабылдайды, бірақ балалардың мәлімделген санын қамтамасыз етуге кепілдік бермейді. Мысалы, жеткізуші 160 орынға өтініш беріп, мақұлдауы мүмкін, бірақ ваучерлерді таратқан кезде жүйе тек 20 ваучерді береді. Өтінімдер әкімдік таратудың басталғаны туралы хабарлағаннан кейін беріледі. Жергілікті әкімдік өз бюджеті шеңберінде өтінімдерді қарау мерзімі мен күнін белгілейді (егер бос қаражат болса, онда өтінімдер қаралады, егер болмаса — мемлекеттік тапсырыстар бұрын мақұлданған жеткізушілер арасында бөлінеді).

Жеткізушілерден өтінімдерді қабылдау, орындарды бөлу және ваучерлер беру 1 қаңтардан 30 қарашаға дейін жүзеге асырылады. 1 желтоқсаннан бастап 31 желтоқсан аралығында барлығы келесі жылдың бірінші жұмыс күніне дейін тоқтатылады. Сондай-ақ, мемлекеттік тапсырысқа бөлінген қаражатты толық игеру кезінде де бағдарлама тоқтатылады.

Орындарды бөлу және ваучерлерді беру сағат 18:00-де ақпараттық жүйемен автоматты түрде жүргізіледі. Өзекті мәліметті таңдалған ақпараттық жүйенің порталдары мен әлеуметтік желілерінен қадағалаған дұрыс.

Ваучер ұтып алғаннан кейінгі әрекеттер

Жеткізуші нақты орындарға ваучер алғаннан кейін, ата-аналар бала 18 жасқа толғанға дейін онымен қызмет көрсету туралы келісімшарт жасайды. Ваучерді қайтару және айырбастау мүмкін емес, бала таңдаған бағытты өзгерте алмайды, мысалы, боксты футболға, сурет салуды модельдеуге, тіпті секциялар мен үйірмелер бір орталықта ұсынылса да. Айына бір балаға аймаққа қарай орта есеппен 15–28 мың теңге бөлінеді. Бір балаға бір ваучер беріледі.

Болашақта жеткізуші балалардың қатысу кестесін жүргізуге және операторға есеп беруге міндетті. Әр балаға жыл бойы бейне және фото материалдары бар жеке портфолио жүргізу керек. Қызмет іс жүзінде көрсетіліп жатқандығын растау үшін жеткізуші сабаққа қатысу табелін толтырады, оған кейіннен баланың ата-анасы ЭЦҚ-мен қол қояды. Егер бала себепсіз үш сабаққа (демалыстан басқа) келмесе, онда жеткізуші оны біржақты тәртіппен шығара салады.

Жыл соңында жеткізуші орындалған қызметтер актісін қалыптастырады, оған ЭЦҚ-мен қол қояды, бағдарлама операторынан тексеруді және қол қоюды күтеді, құжатты ЭШФ порталына тіркейді, содан кейін көрсетілген қызметтерге ақы алады.

Спорттық немесе шығармашылық бизнеске ваучер алу — бұл бизнесті дамытуға, клиенттік қорды кеңейтуге, мемлекеттік қолдау алуға және Қазақстанда балалар спорты мен шығармашылығының әлеуетін дамытуға әлеуметтік үлес қосуға тамаша мүмкіндік береді.