«Кел, балалар, оқылық» жобасы: Jusan тараздық жеткіншектерге армандарына жетуге көмектесті

Jusan Bank қолдауымен Таразда өткізілген режиссер Қуаныш Бейсектің "Кел, балалар, оқылық" жобасының екінші кезеңі өз мәресіне жетті. Жоба қорытындысы ретінде түсірілген деректі фильмнің тұсаукесері 4 қарашада Алматыдағы кинотеатрлардың бірінде өтті. 

"Кел, балалар, оқылық" жобасы аясында режиссер Қуаныш Бейсек бастаған топ Тараз қаласына барып, балаларды режиссер, актер, сценарист және биші мамандықтарының қыр-сырын үйретіп, тәжірибе жүзінде шеберлік сағаттарын өткізді. Шеберлік сағатының қорытындысы ретінде оқушылар қазақ мифологиясы жайлы көлеңкелі театр қойылымын қойып, Zheka лақап атымен танымал блогер Жеңіс Омаровтың "Прощай" әніне бейнебаян түсірді. 

"Басты мақсатымыз балаларға шабыт беріп, олардың армандарының орындалатынына үміт сыйлағымыз келеді. Бұл - балаларға да, ересектерге де шабыт беретін жоба", - дейді жоба тәлімгері, белгілі режиссер Қуаныш Бейсек.

Jusan Bank өкілдерібұл жоба алдағы уақытта да өз жалғасын табатынын жеткізді. 

"Біздің құндылықтарымыз: білім беру, креативті экономиканың дамуы және жас ұрпақтың шабыттандыру. Қуаныштың идеясы осы құндылықтарға сай келді. Жазда жасаған жобамыз халыққа қатты ұнағаны соншалық бізден кейін өз туған ауылдарына барып, игі істер жасайтын адамдар көбейді. Біз балаларды шабыттандырып, оларға жаңа мамандықтар туралы айтып, өмірлеріне кішкене болсын өзгеріс енгізуге тырысамыз. Бұл жобаны тұрақты түрде жылына кем дегенде екі рет еліміздің әр аймағында өткізсек дейміз", - дейді Jusan Bank-тің маркетинг департаментінің жетекшісі Дана Дюсекова.

Дереккөз: Stan.kz