Jusan Bank кеңсесі мереке қарсаңында сыйлықтар фабрикаға айналғандай. Себебі Банк қызметкерлері Қазақстанның барлық өңірлеріндегі аз қамтылған және толық емес отбасы балаларының, Қазақ онкология және радиология ғылыми-зерттеу институтының емделушілерінің, «Досбол» қайырымдылық қорының қамқорлығындағы бүлдіршіндердің тілектерін орындау үшін «Жаңа жылдық ғажайып» сиқырлы акциясына жұмылды. 

Қайырымдылық шарасы банкте қысқы дәстүр іспетті: қызметкерлер балалардың Аяз атаға жолдаған ізгі тілектері жазылған хаттарды сұрыптап, мерекелік «сиқыршыға» айналады.

«Күрделі диагноз қойылған балаларды тәрбиелеп отырған отбасылар әдетте қаржылық қиындықтарды бастан кешіреді. Сондықтан балалардың жаңа жылдық тілектерін орындау түріндегі мұндай қолдау олар үшін өте маңызды. Бұл науқан тек балаларға ғана емес, өзімізге пайдалы десек те қателеспейміз. Себебі олар қуанса, біз де қуанып қаламыз», - деді банктің баспасөз қызметі.

2022 жылы Jusan Bank-ке балалық армандары мен оларға аса қажет нәрселер туралы 100-ден астам хат келді. Кейбір балалар денсаулығын қалыпқа келтіру үшін қажет құрал-жабдықтар, кейбірі гаджеттер мен ойыншықтар сұраған. Ал балалардың хаттарынан кейін банкке ата-аналардан алғыс хаттар да ағылыпты. 

"Балалар Алматыдан сәлемдеме алды! Сіздерге алғысымыз шексіз! Маша мен Женя сондай бақытты! Қуанышымызды сөзбен айтып жеткізу мүмкін емес. Бұл біз үшін расымен баға жетпес сыйлықтар. Мұндай сыйлықтарға ие боламыз деген ой үш ұйықтасақ та түсімізге кірмепті. Сіздердің мейірімділіктеріңізге шын жүректен рахмет!», - деп жазады Солтүстік Қазақстаннан  Решетниковтар отбасы.