Оралда тұңғыш рет республикалық моноспектакльдер фестивалі өтті. Фестиваль облыстық қазақ драма театрының 30-шы маусымының ашылуына және Хадиша Бөкееваның 105 жылдығына орайластырылған.

"Бүгінде Jusan көптеген жобалардың демеушісі болып табылады. Бұл жолы біз осындай ауқымды конкурс өткізуге қолдау көрсетуді жөн көрдік. Өйткені бұл - еліміздегі, соның ішінде Батыс өңірдегі театр өнерін дамыту үшін өте маңызды шара. Көрерменнің сүйіктісіне айналған Х.Бөкеева атындағы Батыс Қазақстан облыстық қазақ драма театрының көркемдік ұжымы  кез-келген қолдауға лайық. Сондықтан Jusan үшін 30 жыл бойы өз көрермендеріне әдемі де әсерлі спектакльдер ұсынып келе жатқан театрдың бас серіктесі болу – үлкен құрмет", – дейді Jusan банкінің бөлім бастығы Алтын Муфтахиева.

Облыстық театр өз шымылдығын 1993 жылы 16 желтоқсанда М.Әуезовтің "Қарагөз" трагедиясымен ашты. Облыс көлеміндегі бір ғана театрда тек республикалық қана емес, сондай-ақ халықаралық театр фестивальдерінің лауреаттары мен жеңімпаздары еңбек етеді.

Фестивальге еліміздің әр түкпірінен 10 театр ұжымы қатысты. Үш күн бойы театр әуесқойлары өнер мерекесінің әдемі атмосферасын тамашалай алды.