Маркетплейстердегі жаппай сатылымдарға дайындалу

Қараша айында барлық маркетплейстерде акциялар мен жаппай сатылымдар — 11.11, Жомарт жұма, жаңа жылға орай арнайы ұсыныстар басталады. Бұл кәсіпкерлер үшін пайда таба алатын кез. Табыс тауып, шығынға батпау үшін дұрыс дайындық керек. Мұны қалай жасау керектігін осы мақалада анықтайық.

Науқандарға қатысу мақсаты

Науқандарға қатысудың екі себебі бар:

сату көлемінің өсуіне байланысты пайданы көбейту
қоймадағы сатылмаған және жақын арада өзектілігін жоғалтатын тауарларды тез сату мүмкіндігі

Кәсіпкерлерге науқандарға қатысу жаңа клиенттерді тартуға, кері байланыс жинауға және тауарлардың рейтингін арттыруға мүмкіндік береді. Сатып алушылар қайта оралып, тұрақты клиентке айналу мүмкіндігі бар, бірақ жаппай сатылымнан кейін олардың көбі қайта келмеуі де мүмкін. Науқан кезінде барлығы тек пайдаға назар аударады, ал сатып алған дүкенді естеріне де сақтамайды. Сондықтан, салынған ақшаны бірден қайтарып алу үшін жеңілдіктердің мөлшерін есептеу маңызды.

Сатушы науқандарға қатыспаса да болады, бірақ онда пайданы жоғалтып алады, өйткені сатып алушылар жеңілдігі бар тауарларға кетіп қалады. Оған қоса маркетплейстер сатылымдардан бас тартқан сатушылардың позицияларын төмендетеді. Егер кәсіпкер жаппай сатылымға қатысуды шешсе, онда оған дұрыс дайындық қажет.

Тауар қорын толықтыру

Сауда басталмас бұрын мыналарды білген жөн:

қоймада әр тауардың қандай көлемде бар екенін және оның көп мөлшерде тұрақты жеткізілімі туралы алдын ала білу. Кешіктірулер болмау үшін бірнеше жеткізушілермен келіссөздер жүргізген дұрыс. Егер олардың біреуі тапсырысты орындамаса, қосалқы шешім болады.
әр тауардың айналымын білу. Тауар айналымы жоғары болған кезде, ол тез сатылады және тұрақты сұранысқа ие болады. Мұндай тауарлардың санын сауда басталмай тұрып көбейту керек, ал сатылымы төмен қалдықтарды жаппай сатылымға қосып, олардан тезірек қойманы босатқан дұрыс.
алдыңғы жылдары қандай тауарлар жақсы сатылғанын анықтау. Бұндай тауарларды жеткілікті мөлшерде сатып алу керек. Ассортиментті әр түрлі өлшемдермен, түстермен және модельдермен кеңейтуге болады. Таңдау неғұрлым көп болса, сатып алушының іздегенін тауып алу ықтималдығы соғұрлым жоғары болады.

Талдау — науқанға дайындықтың маңызды бөлігі. Кәсіпкер қандай тауарларға және қай мөлшерде жеңілдік бере алатынын нақты түсінуі керек. Егер жақсы сатылатын затқа үлкен жеңілдік болса, онда тауарсыз қалу немесе шығынға батып кету қаупі бар.

Талдаудан кейін тауарды сатып алып, оны қоймаларға дұрыс бөлу керек: қалдықтардың көлемі әдеттегіден кемінде екі есе көп болғаны жөн. Қоймада тауарларды сақтайтын орын бар екенін алдын ала біліп алу керек, уақытша қосымша қоймалар қажет болуы да мүмкін.

Бірегей ұсыныс пен бағаны дайындау

Тауарды қоймаға орналастырып қойғаннан кейін, науқан кезінде клиенттерді тарту жолдары мен бәсекелестер арасында ерекшелену туралы ойлану керек.

Баға жаппай сатылым кезінде саудаға әсер ететін негізгі фактор. Тауарлардың әр түрлі топтарына жеңілдіктердің әр түрлі деңгейлерін орнатуға болады. Мысалы, бестселлерлерге 20% және нашар сатылатын тауарларға 50% жеңілдік ұсынуға болады. Клиенттер жеңілдікті көргенде, сатушыға сенім мен сатып алуға деген ұмтылыс пайда болады. Егер бұрын тауардың құны 100 мың теңге, ал қазір 70 мың теңге болса, маркетплейс бағаның қалай өзгергенін көрсетеді. Жеңілдік мөлшері тауардың маржасына тікелей байланысты: киім сияқты жоғары маржалық тауарларға 80%-ға дейін үлкен жеңілдіктер қоюға болады, ал тұрмыстық химия немесе тамақ өнімдері сияқты төмен маржалы тауарларға жеңілдіктер 5 – 20% дейін болуы керек.

Бәсекелестер арасында ерекшелену үшін сатылым кезінде шынымен тиімді жеңілдікті ұсыну маңызды. Бүгінгі таңда сатып алушылар науқандарға алдын-ала дайындалып, тізімдер жасайды және қажет тауарлардың бағасын бақылайды. Егер сатушы бір күн бұрын тауардың бағасын арнайы көтеріп, ал кейін жеңілдік жасаса, онда сатып алушы мұны көріп, қызығушылығын жоғалтады.

Сарапшылар тауар сипаттамасына ерекше атауларды жазуға кеңес бермейді — бұнда тек тауардың атауы мен жеңілдік мөлшері болуы керек, соңғысы — бірегей сауда ұсынысы болып табылады.

Маркетинг құралдарын қосу

Маркетплейстің ұсыныстары мен блогерлерге жарнама беру

Сатылым кезеңінде маркетплейстердің өздері науқанға қатысатын тауарларды жоғары орындарға көтереді, бірақ жақсы нәтижеге жету үшін қосымша маркетинг құралдарын қосуға болады — тауарды басты бетке шығару немесе іздеу нәтижелеріндегі орнын көтеру үшін төлеуге болады.

Жазылмандарына компанияның тиімді ұсынысы туралы айтып беретін блогерлермен ынтымақтастық та сату ауқымын кеңейтеді және жаңа клиенттерді тартады.

Каскадты жаппай хабарлама жіберу

Жаңа клиентті тарту бағасы бар клиентті ұстап қалудан жоғары болғандықтан, клиенттік базамен жұмыс істеу маңызды.

Мұндай жағдайда тиімді құралдардың бірі — каскадты жаппай хабарлама жіберу. Бұл әр түрлі арналар арқылы бір хабарламаны жүйелі түрде жіберу әдісі. Ол мессенджер сияқты арзан арналардан басталады, содан кейін оқылмаған хабарламалар саны төмендеген сайын ең қымбат арналарға ауысады.

Жаппай хабарлама жіберу қалай жүзеге асады? Мысалы, бірінші кезеңде жарнама берушілер өздерінің клиенттер базасын жарнама тарату жүйесіне жүктейді, ол телеграмда адамдарды тауып, оларға жазылатын арналарда жарнама көрсетеді. Назар аудармағандар жарнама таратудың екінші және қымбат кезеңіне өтіп, смс хабарламалар ала бастайды. Бұндай тәсіл клиенттердің көбін жарнамамен қамтып, науқан туралы айтып беруге көмектеседі.

Жеңілдікті бірегей қылып көрсету жолдары

Бәсекелестердің арасында ерекшелену үшін жеңілдіктермен бірге басқа да тартымды ұсыныстарды ұсынуға болады:

Жеңілдік орнына сыйлық беру. Шынайы кейстер бұл кәдімгі жеңілдікке қарағанда сәтті тәсіл болуы мүмкін екеніне дәлел. Мысалы, бір электроника тауарларын сатушы сатып алған әрбір ноутбукке қатқыл дискіні ұсынды. Нәтижесінде клиенттер оның ұсынысын жиі таңдаған болатын.
Бірнеше тауардан тұратын жиынтық. Бір-бірімен үйлесетін тауарлар жиынтығы — бұл саудаға оң әсер ететін тағы бір әдіс. Мысалы, косметика дүкені бетке арналған иісмай, сарысу және бет тазартқыш сияқты күтім жиынтығын ұсынады. Бұл кросс-сату тәсілі орташа чектің өсуіне ықпал етеді және әсіресе сыйлық іздейтін сатып алушылар арасында танымал. Айтпақшы, сыйлықтар туралы айта кетейік.
Жаңа жылдық сыйлықтарға ерекше көңіл бөлу. Зерттеулер көрсеткендей, Жомарт жұмада сатып алынатын тауарлардың үштен екісі жаңа жылға сыйлық ретінде сатып алынады. Тауар мерекеге орай тамаша сыйлық болады деген жазбаны кейбір тауар сипаттамаларында пайдалануға болады. Мысалы, баннерде «Жаңа жылға сыйлық алып үлгеріңіз» деген жазуды қолдануға болады. Сыйлықтармен толтырылған қораптар жақсы сатылады.

Бизнесті жаңа жыл мерекесіне дайындау

Соңғы өлшемдерді жаппай сату. Сатушылар киімнің соңғы өлшемдеріне немесе үлгілеріне жиі бөлек жарнама жүргізеді. Бұл қалдықтарды сатуға жақсы мүмкіндік, сонымен бірге сатып алушылар арасында жедел алып үлгеру керек деген сезімді ұялатады — өйткені тауар бәріне жетпеуі мүмкін.
Рефералды бағдарламалар және арнайы ынталандырулар. Компаниялардың көбі олардың бизнесін ұсынғаны үшін адамдарға жеңілдіктер немесе бонустар ретінде сыйақы төлеуге дайын. Бұндай бағдарламаларды қосымша ынталандырулармен біріктіруге болады. Мысалы, ыдыс-аяқ сататын кәсіпкер мерекелік дастархан жаюды үйрететін тегін шеберлік сабағын ұйымдастыра алады. Шақырылған адамдар қатысып, ыдыс-аяқты бағалайды, ал сатушының тауарды сату ықтималдығы артады.

Өзіңіздің интернет-дүкеніңіз болса

Маркетплейстерде сауда жасайтын кәсіпкерлер сауда алаңының ережелері бойынша жұмыс істейді. Егер кәсіпкердің жеке интернет-дүкені болса, ол әдеттегі сатып алу үлгілеріне сүйене отырып, бәрін өз қалауынша жасай алады. Сонымен, жаппай сатылымға дайындық кезінде:

Жеңілдігі бар тауарларға әкелетін баннерлерді сайттың негізгі бетінде орналастыру. Баннердің өзінде жеңілдік мөлшерін (мысалы, 50%), ал карточкалардың ішінде — соманы (ескіден кейін жаңа баға) жазған дұрыс, онда клиент өзіне тиетін пайдасын бірден көреді.
Шұғыл алып үлгеру керек деген сезімді тудыру үшін таймерлер мен есептегіштерді қосу және дәл қазір тауар карточкасын қарап отырған адамдардың санын көрсетуге болады, бұл қызығушылықты одан сайын арттырады.
Науқан кезінде клиенттерге тегін жеткізу ұсыну, бұл сату ұсыныстарын тартымды етеді.

Офлайн дүкендерге интернетте белсенді болу маңызды — бұл үлкен аудиторияға қол жеткізу мүмкіндігін арттырады.

Жомарт жұма сияқты науқандарға қатысу неліктен маңызды? Жалпы дүрбелең аясында, тіпті үлкен бюджет болмаса да, кәсіпкер өзінің парақшасына аудитория мен трафик тарта алады. Маркетингтік науқандарға қатысу үшін алдын ала талдау жасап, тауарларды жинап, жеңілдіктердің мөлшерін есептеу керек.

Сарапшы:

Дидар Елеубеков

Jusan Дүкенінің тимлиді, маркетплейстерде тиімді сауда жасаудың білгірі