Жалақылық теңсіздік: 2022 жылдың қорытындысы

Гендерлік теңдікке қол жеткізу адамзаттың тұрақты дамуының басты факторларының бірі болып саналады. Біз Қазақстанда әйелдер мен еркектердің жалақыларында қандай айырмашылық бар екендігін тексеріп көруді ұйғардық.

Ресми статистика бойынша 2022 жылы жалақылардағы алшақтық 18.5% болды (бір жыл бұрын – 21.7%). Жұмыспен толық қамтылған ерлердің орташа жалақысы 299 605 теңгені құрады (өткен жылмен салыстырғанда +6.5%), ал әйелдерде – 244 276 теңге (+11.0%).

Инфографикада көрініп тұрғанындай, Қазақстанның тек 3 өңірінде: Жамбыл (6.31%-ға), Солтүстік Қазақстан (5.91%-ға) және Түркістан (0.45%-ға) облыстарында ғана әйелдердің жалақылары ерлерге қарағанда жоғары. Бұл ретте ерлердің пайдасына қарай ең үлкен айырмашылық Атырау (41.08%-ға), Маңғыстау (37.07%-ға) және Қарағанды (29.9%-ға) облыстарында байқалды.

Егер әйелдер мен ерлердің жалақыларындағы айырмашылықты экономикалық қызмет түрлері бойынша қарайтын болсақ, ең үлкен айырмашылық қаржы және сақтандыру саласында байқалады. Мұнда ер азаматтардың жалақылары 33.46%-ға жоғары. Одан кейінгі орындарда өңдеуші өнеркәсіп (17.51%-ға), сондай-ақ көлік және қоймалау (16.59%-ға жоғары).

Экономиканың жалғыз секторы – білім саласында ғана әйелдердің жалақылары ерлерге қарағанда жоғары. Айырмашылық 5.68%-ды құрайды.